CON VOZ PROPIA

Os Obradoiros e Eventos  “CON VOZ PROPIA” nacen para crear benestar e xerar cambios positivos nas persoas, fomentando a autoestima, a asertividade e o apoderamento, liberando e aliviando os bloqueos, axudando a desenvolver o potencial creativo e a descuberta de valores  persoais e promovendo a socialización e a integración no grupo. 

Están dirixidos a un público xeral  e non fai falla ter experiencia previa no canto nin cantar “ben”. Tamén ofrecemos Obradoiros e Eventos “especializados” para recoller as necesidades específicas de diversos colectivos resilientes (mulleres, adolescentes, persoas maiores, discapacidades, saúde mental etc.). 

As actividades de CON VOZ PROPIA son frescas e divertidas, nas que resulta fácil formar parte e desinhibirse xa que as diferencias individuais son ben acollidas,  integradas e respectadas. 

O noso enfoque é maioritariamente práctico e vai dirixido a espertar emocións positivas, traendo á luz,  asemade, os medos e as feridas para ser integradas. Utilizamos recursos da musicoterapia e da danza/movementoterapia e a dramaterapia para fomentar a libre expresión do corpo e a voz, incidindo nunha abordaxe somática (non verbal).

Os movementos de danza e expresión corporal van dirixidos a enraizar o corpo, reforzando seu centro e  liberando a respiración e as emocións.  O canto de grupo (Circle Songs ou Cantos de Roda) sigue esquemas improvisados de “chamada-resposta” e de creación colectiva de harmonías (Coro). Alternamos o canto colectivo como experiencia comunitaria apoderadora co canto individual (opcional), xa que entendemos que as diferencias individuais poden ser de gran valor para o grupo. 

Os Obradoiros e Eventos “CON VOZ PROPIA” contextualízanse no eido sociocultural e non pretendemos substituír a labor terapéutica de profesionais da psicoloxía e a psiquiatría. Imparte Cristal Méndez,  mestra, ensinante de Canto e Arte(s)terapeuta.

Todos os nosos OBRADOIROS “CON VOZ PROPIA” presentan dúas modalidades de intervención: 

• Obradoiro práctico de cantoterapia de 24 horas dividido en 8 sesións de 3 horas cada unha. O traballo é  de grupo e individual.

• Eventos (cápsulas) Tratase dun encontro puntual con intención terapéutica, no que se improvisa e o público participa cantando, movéndose e apoderándose (recorda a un happening).  Sesión única de 90’. O traballo é só de grupo.  

CANTOTERAPIA PARA MULLERES

O Obradoiro CON VOZ PROPIA, CANTO PARA MULLERES, ten como  obxectivos específicos o desenvolvemento da aserción e do apoderamento nas mulleres en relación á necesidade de atreverse a poñer límites e de desenvolver a autoestima.

Outro obxectivo clave para as mulleres é o traballo somático (corpo/voz e corpo/movemento). É importante sinalar que a historia das mulleres na sociedade patriarcal é traumática e que a memoria das superviventes está principalmente inscrita no corpo e na estruturas non verbal. 

A este respecto, desenvolvemos unha serie de actividades para enraizarse e restaurar unha respiración profunda, ao tempo que incidimos no desbloqueo da pelve e a zona escapular, axudando as mulleres a “pisar forte” e a sentirse seguras para apropiarse do espazo. 

Nos nosos Obradoiros e Eventos (cápsula) as mulleres poden “dar voz” á propia historia, nun contexto protexido, no que o grupo integra as diferencias e no que a voz colectiva da forza á voz individual: a “voz propia”.

CANTOTERAPIA PARA ADOLESCENTES

No marco da nosa liña de Canto Terapia chamada “Con Voz Propia”,  MAGA DE VOZ, quixo facerse eco da emerxencia dos problemas de saúde mental na infancia e adolescencia que a recente pandemia puxo en evidencia, aportando o noso pequeno grao de area co deseño dun OBRADOIRO DE CANTO PARA ADOLESCENTES RESILIENTES.

O obradoiro ten unha durada de 24 horas organizadas en 8 encontros semanais de tres horas cada sesión e está concibido no ámbito sociopedagóxico polo que non pretende substituír o traballo terapéutico e de prevención practicado por profesionais da saúde mental. Porén, estamos convencidas de que o traballo co Canto Moderno pode ofrecer canles alternativos  de comunicación e de expresión emocional  na adolescencia, aproveitando o potencial de construción de resiliencia intrínseco ás artes en xeral.  

Utilizando o canto e a música como vehículo principal de expresión e comunicación, ofrécense unha serie de experiencias xestuais, motrices e sonoras (non verbais) que axudan na elaboración de emocións, a adquisición de autoestima, autocoñecemento e asertividade así como a valorización da diversidade e o sentimento de pertenza. 

Ademais, no caso do Canto, a comunicación  tamén será verbal e con fortes contidos sociais porque que as cancións teñen letras nas que xs individxs se poden reflexar individualmente ao tempo que se sinten parte dunha comunidade ou “tribo”. Tamén, en modo inverso, as letras poden ser transformadas e re/creadas ao noso gusto, sobre todo cando nos movemos en contextos de músicas urbanas como son o RAP o TRASH ou o REGGAETON. 

Neste sentido, os contidos do Obradoiro están fortemente influenciados polos estilos chamados “modernos” (música urbana, rock, R&B etc...) nos que destacan a busca da orixinalidade e a liberdade de expresión individual polo que se dará un importante espazo á improvisación e a creación. 

MÚSICA E MULLER. Unha ollada a través da igualdade.

Obradoiro de canto para adolescentes resilientes

Obradoiro de canto para mulleres resilientes

ESTÁS INTERESADA/O NESTE SERVIZO?

Contacta con nós e contámosche os detalles deste servizo.