“CON VOZ PROPIA” CUARTA EDICIÓN NA CASA DA MULLER EN VIGO.

Nesta cuarta edición, está previsto presentar novos contidos como son a asertividade, a toma de conciencia dos estereotipos de xénero, a busca de modelos de resiliencia en cantantes famosas contemporáneas e, naturalmente, a incorporación de  novos elementos de técnica e expresión vocal e corporal para que as “repetidoras” sigan aprendendo. 

Asemade, reforzaranse outros contidos moi importantes xa vistos nas edicións anteriores de técnica vocal e postural para que as mulleres que participan no proxecto por primeira vez, poidan desfrutar dunha formación completa. Compre sinalar tamén que se retomarán as actividades para a atención a necesidades específicas que xa foron detectadas e implementadas na anterior edición como, por exemplo, a adaptación de todo o traballo corporal ás dificultades de movemento asociadas a malestar  osteoarticular (xa que apareceron reiteradamente nos grupos e en mulleres con idades diversas). 

Así mesmo quero resaltar a importancia da memoria e da testemuña das mulleres (maiores pero non só) integrantes do grupo da edición anterior,  como exemplo de resiliencia e fortaleza pretendo rescatar este aspecto no actual seminario e ademais asocialo coa historia  de cantantes “famosas” que lograron con “voz (e forza) propia” superar circunstancias moi desfavorables.